Dalka24

Madaxweyne Shariif”Qorshaha Shabaab waxaa waaye aniga i raac ama gaal ayaa tahay, kitaab jeebkooda ah”

Nuradim — Thu, 11 Mar 2010 08:38:46 +0000

Madaxweynaha Soomaaliya Shariif Sheekh Axmed oo xalay khudbad dhinacyo badan taabaneysay u jeediyay Jaaliyada Soomaalida ee ku dhaqan magaalada London ayaa waxaa uu kaga hadlay xaalada dalka uu marayo.

Madaxweyne Shariif ayaa ugu baaqay dadka qurbaha ku nool in ay gacan ka geysteen sidii dalka loo samata bixi lahaa, isla markaana ay gar gaari lahaayeen dadka tabaaleysan.

Waxaa uu sheegay Jaaliyada Soomaalida looga baahan yahay in ay Nabada Soomaaliya ka qeyb qaataan, isagoo xusay in ay jiri karaan dad ku jira Jaaliyada oo fidno wada.

“Sidaad la socotaan hadii aadan gacan ka geysanin xaalada dalka uu ku jiro waa ay sii xoogeysaneysaa, waxaan nala haboon inaan u midowno”ayuu yiri Madaxweyne Shariif oo sheegay in Kooxaha dowladda ka soo horjeeda ay dadka ku qaldayaan afkaar diin.

Madaxweynaha ayaa xusay in dadka ka soo horjeeda dowladdiisa ay marin habaabinayaan dadka dhalinyarada, isla markaana qaab qaldan ay wax ugu sheegayaan oo aan diinta Islaamka waafaqsaneyn.

“Dadka hada dilka iyo dhibaatada ka wada waan ka xumahay inaan dhaho qeyb ka mid ah waan isla soo shaqeynayay, qaarkood xilligii Maxaakimta guryahooda ayaa ugu tagay si ay nabada uga qeyb qaatan”ayuu yiri Madaxweyne Shariif.

Madaxweynaha ayaa sheegay in Dowladda Ingiriiska ay isku afgarteen in dib loo furo Safaaradii Soomaaliya, isagoo meesha ka saaray wararka sheegaya in Safaaradaha dibada la xirayo.

Dadkii dhageysanayay ayaa si aad u soo dhoweeyay hadalkaas, waxaana qaarkood oo wajiyadooda ka muuqatay xamaasad aad u soo jiitay Khudbada Madaxweyne Shariif uu u jeediyay.

Dagaalo mar kale saaka dib uga qarxay W/Muqdisho iyo AMISOM oo u qalab qaadatay

Nuradim — Thu, 11 Mar 2010 08:27:08 +0000

Dagaalo culus ayaa saaka dib uga qarxay Waqooyiga Magaalada Muqdisho oo shalay dagaaladii ugu xooganaa abid ay ka dhaceen, kaasoo ay si toos uga qeyb qaadanayeen Ciidamada AMISOM.

Sida ay sheegayaan wararka dagaalka saaka ayaa ka duwan dagaaladii la soo dhaafay, waxaana markii u horeysay la arkayay Ciidamada AMISOM oo si aan horay loo arag ugu qalab qaatay dagaalka.

Dagaalka ayaa xoogiisa ka socda degmooyinka Kaaraan, Shibis iyo C/casiis, waxaana si aad loo maqlayaa hugunka Madaafiicda xoogan ee ka dhacaya Qoryaha Taangiga iyo BM-ka.

Wararka qaar ayaa sheegaya in dagaalkan saaka dib uga qarxay Waqooyiga Muqdisho uu yahay abaabulkii dagaal ee beryahan isla wadeen Dowladda KMG iyo AMISOM, marka loo eego sida ay ugu qalab qaateen Ciidamada AMISOM.

Ciidamada AMISOM oo wata taangiyo iyo agab kala duwan ayaa sii galaya jiida hore dagaalka, waxaana wehlinayay Gawaari Bal-doosaro ah, kaasoo ay doonayaan in ay dhufeyso kaga qotaan qeybaha ay dagaan iyo godod boholo ah oo laga faagay wadooyinka in ay aasaan.

Dad goob joogayaal ah ayaa sheegaya in Ciidamada AMISOM ay u egtahay in ay fariisimo ka sameysanayaan Waqooyiga Muqdisho oo marar badan dagaalo ay ku garab siiyeen Ciidamada Dowladda dib uga soo baxay.

Wararka ayaa intaa ku daraya in dagaalkan uu yimid kadib markii Ciidamada Dowladda ay soo faarujiyeen meelihii shalay u qabteen Ciidamada AMISOM, iyadoo Xoogaga Mucaaradkana ay saaka mar kale soo buuxiyeen aagaga dagaalka, isla markaana ku soo dhowaadeen KM-0 oo ah qadka cagaaran ee AMISOM asteysteen.

Lama oga qasaaraha uu geysanayo dagaalka, ha yeeshee waxaa sii kordhaha qasaaraha shacabka soo gaaraya, bacdamaa madaafiic xoogan ay ku socdaan degmooyinka qaar ee Muqdisho.

Ciidamada Dowladda oo la wareegay degaano muhiim ah, Shabaabka oo ka cararay meydad (Daawo Sawirada)

Nuradim — Wed, 10 Mar 2010 17:04:42 +0000

Ciidamadda Dowladda Soomaaliya ayaa guulo ka gaaray dagaalo saaakay ka bilowday waqooyiga magaalada Muqdisho oo ay soo qaadeen maleeshiyaadka Dowladda Ka soo horjeeda.

Deegaano hor leh ayay cidamadu galabta la wareegeen sida fariisimo ay maleeshiyaadku ku lahaayeen deegaanka Beexaani, nasiib buundo iyo garaash geedoole, ayadoo ciidamada Dowladdu ay wali ku sii siqayaan goobo hor leh oo ka tirsan degmada Kaaraan.

Meelaha muhiimka ah ee Ciidamada Dowladda qabsadeen waxaa ka mid ah Hotelka Global ilaa iyo agagaarka mowlac Shariif Sh Muxyadiin.

Taliyaha ciidamada Lugta Dowladda Soomaaliya General Cali Caraale Cosoble (gacma dulle) ayaa hogaaminayay Ciidamada oo ku sugnaa Afka hore ee dagaalka, wuxuuna si weyn ugu howlanaa dagaal gilinta ciidamada, ayadoo meesha ay ka muuqanaysay guul hor dhac ah oo laga gaaray dagaalkii maanta bilaawday.

Ka sokoow dagaalka waxaa goobta ka soconayay baaritaano ay sameynayaan Ciidamada Dowladda Soomaaliyeed, kuwaas oo guryaha baaraya si aysan u dhicin in maleeshiyaadku ay ku dhuuntaan guryaha laga barakacay ee maalmihii la soo dhaafay ay xoogga ku deganaayeen, waxayna gacanta ku soo dhigeen dhowr qof oo ka tirsan Meleeshiyadii dagaalamaysay oo uu ku jiro horjooge Shabaab ka tirsan.

Sidoo kale ciidamada ayaa baarayay wadooyinka waaweyn ee xaafadaha kaaraan iyo shibis mara, si ay uga saaraan hadii maleeshiyaadku ay halkaas ku aaseen miinooyin sida caadada u ah, iskastoo aan wali la arag wax miino ah oo halkaas laga bixiyay.

Maleeshiyaadka Shabaab iyo Xisbul islaam uma kala harin Dagaalka saakay inkaastoo ay isku hagradeen, maleeshiyada Shabaab waxay afka hore ee dagaalka saakay soo geliyeen ajaanib fara badan oo maalmihii la soo dhaafay lagu uruurinayay waqooyiga magaalada Muqdisho, waxay filayeen in ay dhagartooda guul ku helayaan, hase yeehsee horjoogayaal badan ayaa uga dhintay dagaalka, dadka ku nool waqooyiga Muqdisho ayaa sheegay in in ka badan 15 qof oo dhaawac ah una muuqday ajaanib la arkay.

Waxay ka carareen goobo badan oo aagga dagaalka ka fog sida Saldhigga Kaaraan iyo Isgoyska Sanca, Waxaana la arkayey maleeshiyaad firxad ah oo wadada wadnaha si baqdin ku jirto u sii cararaye, sidoo kale waxaa dhaqdhaqaaqyo ay ka wadaan qeybo ka mid ah koofurta Magaalada iyo saldhigga ay ku leeyihiin halka loo yaqaano Maslax oo ku yaala deegaanka Suuqa xoolaha.

Sarkaal Ajaaniib ah oo ku geeriyooday dagaaladii W/Muqdisho

Nuradim — Wed, 10 Mar 2010 13:47:56 +0000

Warar soo baxaya ayaa sheegaya in dagaaladii maanta ka dhacay xaafadaha Waqooyiga Muqdisho oo u dhaxeeyay Ciidamada Dowladda KMG iyo Shabaabka uu ku dhintay Sarkaal Ajnabi ah oo ka mid ah ajaaniibta ka bar bar dagaalanta Shabaab.

Sarkaalkan ayaa la sheegay inuu ahaa kuwo ugu caansan Shabaab ee dagaalada hogaamiya, waxaana uu ka mid ahaa labo kale ajaaniib ahaa oo saaka ku dhintay dagaalka, inkastoo aan wali kala cadeyn.

Wararka ayaa sheegaya in sarkaalkan oo lagu magacaabay Abuu Muscab Al-Jazaa’iri oo dhalashadiisa tahay dalka Algeria uu ku geeriyooday aaga degmada C/casiis oo dagaal kulul ka dhacay.

Sarkaalkan ayaa lagu soo waramayaa inuu xubin fir fircoon ku lahaa dhaq dhaqaaqa Alshabaab, waxaana bilihii u dambeeyay hogaaminayay dagaalada Muqdisho ka dhaca.

Dagaaladii ka dhacay Waqooyiga Muqdisho ayaa ahaa kuwii ugu cuslaa ee mudooyinka dhaca, waxaana ay soconayeen saacado xiriir ah, kadib markii weeraro lixaad leh ay soo qaadeen Shabaabka

Xasan Dahir Aweys oo dhuumasho ku jira

Nuradim — Wed, 10 Mar 2010 05:12:55 +0000

Hoggaamiyaha Maleeshiyada Xisbul islaam ayaa ku jira xaalad khatar ah kadib markii la soo gaarsiiyay fariin ah in la dili doono isaga iyo xubnaha ka tilmaaman kooxdiisa.

Aweys oo cadaadis uga imaanaya maleeshiyada shabaab ayaa la soo gaarsiiyay war ku saabsan in shabaabka ay magaalada kismaayo ku go’aamiyeen in la khaarajiyo Xasan Dahir iyo xubnaha muhiimka ah ee Xisbul Islaam.

Maleeshiyada shabaab ayaa shalay si bareer ah u toogtay Barre Cali Barre oo ahaa taliye sare ee Xisbul Islaam ka tirsanaa,waxaana dilkiisa fuliyay kooxda shabaab sida ay xaqiijiyeen dad goobjoogayaal ahaa la kulmay markii sarkaalka la dilayay.

Amaanka Xasan Dahir ayaa la adkeeyay isagoo ka walaacsan sii jiritaanka kooxdiisa.

Warar ku dhaw dhaw Shabaabka ayaa sheegaya in kulankii dhawaan ka dhacay Kismaayo oo ay ka qeybgaleen xubno fara badan oo Shabaabka ka mid ah lagu go’aamiyay in la soo dilo xubno uu ku jiro Sh Xasan Dahir Aweys.

Dablayda shabaab ayaa waxay ka amar qaatan xubno al qaacida ka tirsan oo fal dambiyeedyo fara badan gacanta kula jira kuwaas oo dhibaatooyin kala duwan u geysta shacabka soomaaliyed.

Shabaabka oo ku jabay dagaal ka socda Xaafadaha Shibis,C/casiis ee magaalada muqdisho

Nuradim — Wed, 10 Mar 2010 05:03:41 +0000

Wararka naga soo gaaraya magaalada muqdisho ayaa sheegaya in dagaal culus oo la isku adeegsanayo hubka culus uu saaka waaberigii ka bilawday degaanada ku teedsan dhinaca waqooyi ee magaalada muqdisho.

Dagaalka ayaa u dhaxeeya ciidamada Dowladda KMG ah ee Soomaaliya iyo Maleeshiyaadka shabaab iyo dagaalyahano ajanabi ah kuwaas oo dhibaatooyin ballaaran ku haaya shacabka soomaaliyed.

Sida ay sheegayan wararka dagaalka ayaa waxaa uu inta badan ka dhacayaa degmada xeebta xigta ee C/casiis halkaas oo muddo isku hor fadhiyeen Ciidamada Dowladda iyo dablayda shabaab.

Ciidamada Dowladda ayaa ku sii sigaya goobo ay ku sugnaayen dablayda shabaab, dadka degaanka ayaa laga soo xigtay in ay arkeen meydad dhawr ah oo maleeshiyada shabaab ka tirsan.

Dagaalka oo weli socda ayaa la ogeyn khasaaraha ka soo gaaray dadka fara ku tiriska ah ee markii horeba ku haray xaafadaha dagaalka ka socda.

Diyaarad Nooca Dagaalka ah oo lagu arkay hawada Magaalada Kismaayo

Nuradim — Tue, 09 Mar 2010 15:59:33 +0000

Iyadoo maalmahan si weyn loo hadal haayo wararka ku saabsan in ciidamada Mareykanka dhinaca hawada iyo dhulka kaga qeyb qaadan doonaan dagaalka ay Dowladda KMG ah la damacsan tahay kooxaha hubeysan ee Shabaabka ka mid tahay ayaa Maanta gelinkii danbe lagu arkay Hawada Magaalada kismaayo Diyaarad Nooca Dagaalka oo ku dulwareegeysay hawada magaalada kismaayo ee xarunta gobolka J/hoose.
Diyaaradan oo aan la garanayn halka ay kasoo duusha iyo weliba ujeedada rasmiga ah ee ay leedahay ayaa galabta lagu arkayay hawada magaalada kismaayo iyada oo ay diyaaradaasi ku dulwareegeysay daafaha magaalada, waxaana maleeshiyada alshabaab ee ka arimiya magaalada kismaayo ay ku rideen hubka lidka diyaaradaha.
�
Shacabka ku dhaqan magaalada kismaayo ayaa waxa ay cabsi ka muujiyeen diyaaradani oo ah nooca dagaalka wallow aysan jirin wax dhibaato ah oo ay geysatay diyaarada.
�
Magaalada Kismaayo ayaa ka mid ah meelaha ay ku sugan yihiin dagaalyahanada al qaacida ee ka barbar dagaalama kooxda shabaab.

Nin Eriterian ah oo Shabaab ka tirsan oo lagu xiray Mareykanka

Nuradim — Tue, 09 Mar 2010 15:55:04 +0000

Maxkamad ku taal dalka Mareykanka ayaa ku eedeysay nin u dhashay dalka Eriteria in uu dhaqaale ku taageero kooxda Alshabaab ee ka tirsan ururka Alqaacidda.

Xeer ilaaliyaha maxkamadda ayaa sheegay in Maxamed Ibraahim Axmed oo deggan dalka Sweden garsoore la hor geyn doono.

Ninkan oo lagu qabtay dalka Nigeria loona qaaday dalka Mareykanka, waxaa loo heystaa in uu dhaqaale ku taageeray kooxda Shabaab ee rabshadaha iyo dhibaatada ka wadda Somalia.

Ninkan Eriterian-ka ah, ayaa la sheegay in uu lacag dhan 3 kun oo Euro u soo ururiyay kooxda Shabaab, isagoo horayna tababarro ku saabsan fulinta falalka argagixinta ku qaatay xeryo ku yaalla gudaha Somalia oo ay maamusho Alqaacidda.

Bishii April ee sanadkii 2009 ninkan Eriterian-ka ah ee lagu magacaabo Maxmed Ibraahim Axmed oo ay wehliyaan Calooshood u shaqeystayaal shisheeyo oo ka tirsan Alqaacidda ayaa tababarro ku qaatay Somalia.

Haddii maxkamaddu ku hesho dambiyada loo heysto ninkan Eriterian-ka waxa uu muteysan doonaa 45 sano oo xarig ah

Ururka Xisbul Islaam oo ka hadlay dilka Sarkaal sare oo maanta looga dilay Magaalada Muqdisho

Nuradim — Tue, 09 Mar 2010 14:33:46 +0000

Xoghayaha Wafaafinta ee Ururka Xisbul Islaam Sheekh Maxamed Macallin Cali ayaa ka hadlay dil loo geystay Barre Cali Barre oo ka mid ahaa saraakiisha Ururka Xisbul Islaam, kaasoo la rumeysan yahay in ay dileen maleeshiyada Shabaab.

“Allaha U Naxariistee Barre Cali Barre waxaa toogtay koox burcad ah isagoo ku sugan suuqa weyn ee Bakaaraha, waxaana socda baaritaanno lagu ogaanayo kuwii ka dambeeyay dilkiisa” ayuu yiri Sheekh Maxamed Macallin Cali.

Marxuumka ayaa la sheegay inay toogteen afar dhallinyaro ah oo ku hubeysan bastoolado xilli aysan la socon ilaalo, waxaaa uu u geeriyooday dhowr xabadood oo kaga dhacay qaybta sare ee jirkiisa.

Wararka soo baxaya ayaa sheegaya in dablayda shabaab ay dilkiisa ka dambeeyeen iyagoo muddo ku taamayay sidii ay u khaarajin lahaayen sarkaalkan.

“Xisbigu wuxuu kasoo saari doonaa war murtiyeed dilka Marxuum Barre Cali Barre oo maydkiisa ay kasoo qaadeen halkii lagu dilay saraakiil iyo ciidamo ururka ka tirsan” ayuu yiri Guddoomiye ku xigeenka Ururka Xisbul Islam oo isaguna saxaafadda si kooban ula hadlay dilka kaddib.

Marxuumka ayaa ka mid ahaa xubnaha ay sida weyn isugu dhow yihiin Sheekh Xasan Daahir Aweys oo ah guddoomiyaha Ururka Xisbul Islaam, wuxuuna ka mid ahaa saraakiishii sida weyn uga soo horjeestay ku biiritaankii Sheekh Xasan Turki uu ku biiray maleeshiyada shabaab.

Shabaabka oo dilay Taliyihii Ciidamada Xisbul Islaam Bare Cali Barre

Nuradim — Tue, 09 Mar 2010 10:02:16 +0000

Sarkaal katirsanaa Ururka Xisbul Islaam ayaa goordhow kooxo hubaysan waxa ay ku toogteen gudaha Suuqa Bakaaraha ee magaalada Muqdisho.

Sida ay xaqiijiyeen dad goob joogayaal ah kooxo ku habaysnaa hub fudud ayaa goordhow waxa ay gudaha Suuqa Bakaaraha gaar ahaan agagarka halka loo yaqaano Maalin taajir waxa ay ku toogteen Sarkaal sare oo katirsanaa Ururka Xisbul Islaam kaasi oo lagu magacaabi jiray Barre Cali Barre.

Marxuumka ayaa dhawaan ka badbaaday isku day dil ah oo lala damacsanaa laakiin markan sida muuqato waa lala helay.

Kooxaha fuliyay dilka marxuumka ayaa waxay ka tirsan yihiin maleeshiyada shabaab.