Madaxweynaha Dowladda KMG ah Shariif Sheekh Axmed ayaa Maanta ka war bixiyay Arrimo faro badan oo ku saabsan Safarkiisi uu ku tagay  Ingiriiska, iyo Heshiiskii Dowladda iyo Culuma’udiinka Ahlusunna Waljamaaca.

Shariif Sh. Axmed Madaxweynaha Jamhuuriyadda Soomaaliya oo Galabnimadii ayaa waxa uu uga hadlay arrimo faro badan kuwaas oo kala ahaa Booqashadii uu ku tagay Dalka Ingiriiska, Heshiiskii ay Dowladda iyo Culumaa’udiinka Ahlu-Sunna Waljamaaca ku kala saxiixdeen Magaalada Addis-Ababa ee Dalka Itoobiya iyo Warbixintii ay soo saartay Kooxda Monitoring Group. 

Mar uu Madaxeyne Shariif Sh.Axmed ka hadlayay Heshiiskii ay   Shalay Magaalada Addis-ababa kusoo kala saxiixdeen Dowladda Soomaaliya iyo Culumaa’udiinka Ahlu-Sunna waljamaaca ayuu tilmaamay in Heshiiskaasi ahaa guul balaaran oo u soo hoyatay Ummadda Soomaaliyeed, islamarkasna loo bahan yahay in ay Shacbigu helaan Dowlad u adeegeysa Bulshada oo hanata Ammaanka, soona celisa Nidaamka iyo kala dambeynta Soomaaliya.

Waxa uu Madaxweynuhu xusay in Dowladda Soomaaliya ay dadaal ugu jirto sidii loo sii kordhin lahaa arrimaha Dib u heshiisiinta oo ay Cid walbo ugu soo biiri laheyd Dowladda, isagoo hadalkiisa ku daray in ay Dowladdu ka soo horjeedo Cid kasto oo aan daneyneyn in ay Nabad ka dhalato Gudaha Soomaaliya.

Madaxweynaha Dowladda federaalka KMG-ka Soomaaliya Shariif Sh.Axmed ayaa ka hadlay wabixintii ay soo saartay Kooxda Monitoring Group, isagoo Qaar kamid ah Waxyaabihii lagu soo qoray  warbixintaasi ku tilmaamay in ay yihiin kuwo xaqaa’iqa ka fog oo aysan ka muuqan Xog-ogaalnimo dheeri ah.

Waxa uu Madaxweynuhu soo hadal qaaday in Warbixintaasi ay Ciidamada Dowladdu ku eedeeysay in aysan dhisnayn, taasoo uu sheegay M/weyne Sh.Shariif inay tahay mid Meel ku dhac ku ah Dowladda KMG-ka Soomaaliya.

Mudane Sh.Shariif Sh.Axmed ayaa sidoo kale sheegay in ay Guddi u saarayaan la socodka Warbixintaasi, islamarkaasna   Jawaab cad ay ka bixin doonto Dowladda Soomaaliya.

Guddoomiyaha Baarlamaanka KMG ah ee Somaliya Sh Aadan Maxamed Nuur (Aadan Madoobe) ayaa wax kama jiraan ku tilmaamay warbixin ay Golaha amaanka ee Qaramada Midoobay u gudbiyeen guddi dabagal ku sameeyay xiriirka ka dhaxeeya ganacsato soomaali ah oo hay’adaha UN-ka qaatay qandaraasyada kuwaas oo lagu eedeeyay in ay xiriir la leeyihiin ururka Al Shabaab.

Aadan Madoobe ayaa si weyn uga dhaliilay warbixinta guddiga dhawaan baaris ku sameeyay gargaarka la geeyo Soomaaliya, kuwaasoo qoraalkooda ku eedeeyay ganacsato Soomaali ah.

Afhayeenka Baarlamaanka ayaa waxay si weyn u dhaliileen qoraalkan oo lagu soo daabacay wargeyska The New York Times, kaasoo lagu sheegay in Qandaraaslayaasha la shaqeeya WFP ay xiriir la leeyihiin Al shabaab.

“Runtii waa wax aad loola yaabo warbixinta, haddii aan idin sheego Sh Ibraahim C/llaahi waxaa ku wareejiyay labada bakhaar eek u dhaw xaruntii Baarlamaanka Dowladda KMG ah ee Somaliya,sidaas darteed waxaan u sheegay beesha Caalamka in ganacsadahaas laga been abuuray”ayuu yiri Sh Aadan Madoobe oo wariyaasha kula hadlayay magaalada Nairobi.

Sh Aadan Madoobe ayaa sheegay in loo baahan yahay in aan la isku qasin runta iyo wararka beenta ah, waxaa uu u soo jeeday qaramada miidoobay in ay si taxadir leh u eegto warbixinta maadama ay tahay mid qaawan oo aan laga fiirsanin.

Afhayeenka Baarlamaanka ayaa sheegay in Sh Ibraahim C/llaahi iyo raga kale ee la midka ah ay gurmad ballaaran u fidiyeen umadda soomaaliyed iyagoo mar walba naftooda halis gelinaya ayaa haddana looga abaalmariyay warbixino qalad ah in laga sheego.

Gobolka Shabeelaha Dhexe, ayaa dhowaan gacmaha iyo lugaha looga gooyay ugu yaraar 2 qof oo lagu eedeeyay howlo burcadnimo ah.

Maleeshiyada al-Shabaab, oo iyadu gacanta ku haysa maamulka gobolkaasi, ayaa xukunka ku fulisay ragga la soo eedeeyay iyadoo aan la soo bandhigin marqaatayaal

Hase yeeshee, waxaa tallaabooyinka laga qaaday eedaysanayaasha si xoog leh uga soo horjeestay Cali Sheekh oo ah guddoomiyaha gobolka Shabeelaha Dhexe ee dhowaan ay dowladdu halkaa su magacawday.

Cali Sheekh, ayaa sheegay in lagu deg degay xukunka gacan iyo lug goyska ah ee ka dhacay Shabeelaha Dhexe, isagoo duray aqoonta dhinaca diinta ay u leeyihiin kooxda xukunka fulisay.

Waxaa uu sheegay in Shabaabka ay xoog ku haystaan gobolkaas sidaas darteedna aysan xaq u lahayn in ay dad xukuman maadama ay iyaguba xaaran ku joogan gobolka

Markab laga leeyahay wadanka France oo lagu magacaabo F732 ayaa Maanta Galinki Danbe Maamulka Puntand ku soo wareejiyay 24 Nin oo Burcad badeed Somaaliyeed ah oo laga soo qabtay Xeebaha Somaliya.
�
Burcadda Maamulka lagu soo wareejiyay ayaa Markoodi hore ka soo baxay Xeebta Ceel macaan, Waxaana lasoo qabtay iyaga oo Qorshaynaya in afduubyo ay ka Gaystaan Xeebaha Gacan Cadmeed

Markabka soo wareejiyay Burcad Badeeda ayaa soo istaagay Meel aan wax badan ka Fogayn Xeebta Bosaaso,Waxaana Saarnaa in ka badan 200 oo askari oo ah Ciidamada Dalaayadaha ku booda ee sida gaarka ah u tababaran.

�
Saraakiil ka socotay Puntland iyo Madaxda Markabkaasi ayaa kulan saacado qaatay Wada Galay ,ka hor inta aan Burcad la soo wareejin ,iyadoo ay wada Galeen heshiis ku saabsan la dagaalanka Burcad badeeda.

�
Burcada lagu soo wareejiayy Puntland ayaa la sheegay in ay wateen Afar Doomood oo nooca dheereeya ah,Waxaana labo ka mid ah Doonyahoodi Gubay Ciidanka Saaran Markabkaasi dushiisa.
�
Labo ka mid ah Burcad badeeda la keenay Xeebta Bosaso ayey Ciidamada France sheegeen in aan wax danbi ah lagu soo qaban, balse laga shakiyay oo kaliya

Taliye ku xigeenka Ciidanka Boliska Puntland Maxamed Siciid Jaqanaf ayaa sheegay in Raggan ay ka soo jeedaan Koonfurta Somaliya,Isla markaana la sii daynayo Labada aan danbiga lahayn ee shakiga lagu soo qabtay.
�
Ugu danbaynta Burcadda la keenay Magaalada Bosaaso ayaa lagu wadaa in dhawaan Maxkamada la soo taago ,Waxaana inta badan Maraakiibta Shisheeye ay Puntland ku soo wareejiyaan Burcad noocaan oo kale ah

Dagaalo culus oo ka dhacay tuulooyin hoostaga gobolka Mudug ee bartamaha Soomaaliya, ayaa waxa ku dhintay 15 ruux in kabadan 20 kalana waa ay ku dhaawcmeen sida ay xaqiijiyeen dadka deegaanka.

Dagaalka maanta oo ka dhacay tuulooyin u dhaxeeya Camaara iyo Bacaad weyn, ayaa waxa ay daba joogaan dagaalo horey halkaasi ugu dhex maray labo beel oo wadaag ah oo halkaasi kuwada dhaqan.

Dagaalka maanta, ayaa maleeshiyooyinka labada beel waxa ay adeegsanayeen baabuurta dagaalka iyo qoryaha boobayaasha ah waxaana uu dagaalku soo gaaray ilaa gabbal dhicii.

Dhaawacyada labada dhinac ayaa loo kala qaaday, degmooyinka Galkacyo iyo Xaradheere.

Sida ay sheegayaan dadka tuulooyinka Bacaad weyn iyo Camaara, waxaa laga cabsi qabaa dagaalo kale oo hor leh in ay mar kale dilaacaan, sababtoo ah waxaa jira gurmadyo soo kala gaarya labada maleeshiyo beelood oo dagaalkooda uu ku qotomo muran dhinaca dhulka ah.

Madaxweynaha KMG ah ee Soomaaliya Shariif Shiikh Axmed ayaa xalay kula kulmay magaaladatan London jaaliyada Soomaaliyeed ee UK.

Kullanka oo ka dhacay Bariga magaalada London ayaa Madaxweynaha khudbad dheer oo uu halkaasi ka jeediyaya waxa uu ka waramay xaaladda dalku uu ku sugan yahay maanta xagga ammaanka iyo noloshaba, isagoo ka codsaday Soomaalida UK inay gacan ka geysato sidii Soomaaliya ay mar kale lugaheeda isugu taagi lahayd.

Madaxweyne Shariif waxa uu ka hadlay dadaalka ay dowladdiisu ugu jirto sidii ay maamulkeeda ugu fidin lahayd dalka iyo caqabadaha horyaalla.

Madaxweyne Shariif waxa uu sidoo kale ka hadlay safarkiisa dalkan Britain iyo kulankii uu la yeeshay Ra’iisul Wasaaraha Britain Gordon Brown, isagoo sheegay in dowladda Britain ay ogolaatay in dib loo furso safaaraddii magaaladatan Soomaaliya ay ku lahaan jirtay London.

Madaxweynaha iyo wafdigiisa ayaa lagu wadaa in caawa ay la kulmaan jaaliyadda Soomaalida ee magaalada Birmingham.

Xildhibaan Mustaf Dhuluxoow oo mar ahaan jirey Wasiirka Beeraha ayaa sheegey in wafdi uu kamid yahey eey u baqooli doonaan Magaalada Adis Ababa ee Wadanka Ithopia si eey usoo saxiixaan heshiiska ahlu suna iyo dowlada Wada Galayn