Eedeysanahan oo aan magaciisa la sheegin ayaa lagu eedeeyay inuu dhaqaale ka badan 30,000-Dollar uu ku taageeray Shabaab, oo la sheegay inay xiriir la leedahay shabakadda Al-Qaacida, waana dacwaddii ugu horreysay oo ruux loo soo taago eed noocan oo kale ah, tan iyo markii uu sharciga soo baxay 2002 oo lagu diidan yahay in dhaqaale lagu taageero kooxaha ay u yaqaannaan argagaxiso.

Maxkamad ku taalla magaalada Oslo ee xarunta dalka Norway ayaa dhammaadkii sannadkii hore ku eedeysay ninkan oo da’diisu tahay 40-sano, inuu lacag gaarysa 200,000-Kroner oo lacagta Norway ah una dhiganta 33,000-Dollar ka ururiyay dalkaas uuna u diray al Shabaab sannadihii 2007 – 2008.

Dacwadda ayaa sheegay in ruuxan 40-jirka ah uu u diray lacag gaaraysa 500-Dollar Sheekh Fu’aad Maxamed Qalaf sannadkii 2007, sidoo kalena uu 10,000-Dollar u diray Sheekh Aadan Xaashi Cayrow bishii Jannaayo ee 2008, mas’uuliyiintan oo ka mid ah saraakiisha Shabaab, waxaase Sheekh Cayrow lagu dilay duqeyn uu Mareykanku ka geystay Soomaaliya dhammaadkii 2008.

Sidoo kale dacwaddu ay leedaha in eedeysanahan uu xilligaas taleefoon kula xiriiray Sheekh Qalaf oo ku suganaa dalka Sweden uu u sheegay inuu lacagtaas ku gado hub, uuna geeyo Soomaaliya.

Qareenka difaacaya eedeysanahan oo lagu magacaabo Frode Sulland, ayaa diiday in ninkan la haysto uu lacag u diray Shabaab, balse uu taageerayay Maxkamadihii Islaamka ee xilligaas jiray, kuwaasoo ku howlanaa sidii ay nabad iyo kala dambeyn ugu soo celin lahaayeen Soomaaliya, sannado badan oo fowdo ah kaddib.