Wasiirka Dastuurka Dowlada KMGS, Madoobe Nuunow Maxamed ayaa nasiib darro ku tilmaamay qilaafka soo kala dhex galay madaxweynaha iyo ra’isulwasaaraha ee ku saabsan arrinta dastuurka qabyada ah ee uu isagu hormuudka ka yahay

Mr Nunow ayaa sheegay in xiligan aysan ku habooneyn in madaxweynaha uu diido dastuurka waqti buu yiri lagu guda jiray diyaarintiisa iyo isku daba ridkiisa, isaga oo codsaday in laga fiirsado mar kale hakinta dastuurka.

“Xaqiiqdii waa nasiib darro in madaxda sare ee dowlada ay isku qilaafaan arrinta dastuurka, sababtoo arrin ama howl marka la dhameeyo ayaa la diidaa ama la ogolaadaa laakin xiligaan oo dastuurkan howshiisa ay meel wanaagsan mareyso in la isku qilaafaa waa wax aan aad uga xumahay” ayuu yiri Madoobe Nuunow.

Shalay madaxweynaha dowlada KMG Shariif Sh Axmed ayaa qoraal saxaafadeed uu soo saaray waxa uu ku sheegay in xiligaan aaney fududeyn in dastuur aanan laga fiirsan laga sameeyo dalka.

Madaxweynuhu, war-murtiyeed uu siiyey warbahinta, wax uu ku yiri, “Dastuur cusub oo Soomaaliya loo sameeyo waa howl qaran oo ahmiyad gaar ah leh, muggeeduna ballaaran yahay, taas oo ay tahay in uu ahaado hab cad oo aan daldaloollo lahayn islamarkaana ku fadhiya sharciyad iyo qaneeco shacab.”

Madaxweyne Sheekh Shariif waxaa kale oo uu tilmaamay “Si loo helo dastuur dhab ahaan ay Soomaali leedahay, waa in qoraalka qabyada ah uu noqdo mid ay ka dhex muuqato yididiilada iyo danaha shacabka Soomaaliyeed, taasina waxaa lagu gaari karaa ka qeyb-gal dadweyne oo aad u ballaaran.”

Ra’isuwlasaare Cumar C/rashiid ayaa ka fakar duwan madaxweynaha waxaana uu isagu aaminsanyahay in joojinta dastuurka ay tahay mid aanan barakeysneyn oo keeni karta dib u dhac kale oo soo hardiya dalka Soomaaliya