Ciidamada Booliska Maamulka Soomaaliland ayaa xabsiga dhigay afar qof oo looga shakiyay in ay xiriir la leeyihiin kooxaha argixisada ah ee ka dagaalama soomaaliya kuwaas la rumeysan yahay in ay xiriir la leeyihiin kooxda Al qaacidada.

Sida ay sheegayan wararka naga soo gaaraya Magaalada Hargeysa afar qof oo laba ka mid ah ay haween yihiin in la qabtay galabnimadii axadda xilli ay ku safrayeen gaari ku sii jeeday magaalada Hargeysa waxayna ka yimideen Magaalada Adiss Ababa, ayagoo ka soo gudbay deegaanka Wajaale oo u dhow xadka Itoobiya iyo Soomaaliya.

Ciidamda Booliska ee magaalda Gebileey ee maamulka Somaliland ayaa sheegay in ay dadkaani ay ku sii jeedeen magaalada Hargeysa si ay uga fuliyaan qaraxyo iyo weeraro kale, waxayna warar hoose sheegayaan in ciidamadu ay ka heleen boorso ay wadatay labada dumarka waxyaabo laga sameeyo walxaha qarxa.

Maleeshiyaadka xiriirka la leh Alqaacida ee dagaallada ka wada Soomaaliya ayaa horay weeraro is miidaamin ah uga fuliyay gobollada Woqooyi  Bari iyo Woqooyi galbeed ee maamulada Puntland iyo Somaliland, waxayna maamulka Somaliland ka cabsi qabaan in ay weeraro la beegsadaan doorashooyinka dhawaan ka bilaabaneya gobollada maamulka Soomaliland.