Idaacada Shabelle oo ka mid ah Idaacadaha afka dheer ee Magaalada Muqdisho ka howl gala ayaa saaka isaga soo guurtay xaruntii ay ku laheyd Suuqa weyn ee Bakaaraha, kadib markii muddo 8-sano ay ku howl galeysay Daarta Global ee wadada labaad Suuqa Bakaaraha.

Idaacada oo soo martay marxalado kala duwan ayaa saaka u soo guurtay Xeyndaabka Dowladda KMG ah ee Soomaaliya, iyadoo soo guuritaankeeda ahaa mid qarsoodi ah.

Wararka aanu heleyno ayaa sheegaya in Maamulka Idaacada oo maalmahan waday qorshe ay uga guurayeen Suuqa Bakaaraha oo ay maamulaan Xoogaga Mucaaradka ee Dowladda ka soo horjeeda.

Idaacada oo saaka hawada ka maqneyd ayaa dad badan is weydiinayeen sababaha hawada uga baxday, hase ahaatee waxaa markii dambe la ogaaday in goor hore oo aroortii ah ay isaga soo guureen, qalabkoodiina ka soo rarteen.

Guuritaanka Idaacada ayaa sidoo kale ahaa mid aanay ka warqabin Wariyeyaasha, waxaana saaka qaar ka mid ah wariyeyaasha Idaacada ay tageen iyadoo albaabada u xiran yihiin, taasoo layaab ku noqotay.

Warar qaar ayaa sheegaya in markii Idaacada saacado hawada laga waayay ay xarunta Idaacada tageen qaar ka tirsan Xoogaga Hubeysan, kuwaasoo markii horeba Idaacada si hoose dhaq dhaqaaqa ula socday.

Shabelle ayaa ka mid ah Idaacadaha u dhega nuglaada amarada Xoogaga Hubeysan, waxaana ay dhaqan gelisay tallaabadii Ururka Xisbul Islaam uu kaga mamnuucay idaacadaha sii deynta Heesaha iyo Muusiga.

Hase ahaatee lama oga sida ay ku shaqeyn doonto xilligan oo xeyndaabkii Dowladda kaga sugneyd Caasimada ay saldhigatay, iyadoo ay muuqatay caburin gaar ah oo ay kala kulmeyso Xoogaga Hubeysan.

Idaacada Shabelle ayaa waxaa Bishii June ee sanadkii hore maalin cad Suuqa Bakaaraha looga dilay Agaasimaheeda Allaha u naxariistee Mukhtaar Maxamed Hiraabe, sidoo kale sanadkaas ayaa waxaa ka dhintay ilaa saddex wariye oo Idaacada ka howl galayay