Danjiraha Dowladda Somaliya u fadhiya Kenya ayaa wax kama jiraan ku tilmaamay war maanta ku soo baxay qaar ka mid ah Warfaafinta soomalida kuwaas oo daabacay in Danjire America uu sheegay in ganacsatada soomaalida ay xiriir la leeyihiin Al shabaab oo ah urur ku xiran Al qaacida oo Mareykanka ku tilmaamay Argigixisada Caalamka khatarta ku ah, wuxuuna safiirka beeniyay warkaas isagoo cadeeyay in warkaas uu yahay been abuur cad.

Safiir Maxamed Cali America ayaa warkaas ku tilmaamay mid laga been abuuray isla markaana uusan jirin meel uu saxaafadda kula hadlay, wuxuuna sheegay inuu ka xun yahay in laga been abuurta shaqsiyadiisa.

Danjire Maxamed Cali America ayaa ku tilmaamay ganacsatada soomaaliyed kuwa horumar ah ka sameeyay ganacsiga, isagoo xusay in ganacsiga soomaaliya uu yahay midka maanta badbaadinaya dadka soomaaliyed ee dhibaatooyinka ragaadiyay 20 kii sano ugu dambeeyay ee dalka dagaalada sokeeyay ka socdeen.

Wuxuu sheegay Safiirka in Ganacsatada soomaaliyed ee Magaalada Nairobi ku amaanayo sida wanaagsan ee ganacsiga soomaalida ugu soo bandhigeen Afrikada iyo qaaradaha kale ee adduunka.

“Ganacsatada soomaaliyed wax xiriir ah lama laha Shabaab, warkaas ma garanayo meesha uu ka yimid, :ayuu warkiisa raaciyay Safiirka soomaaliya ee Kenya Maxamed Cali America.

Ma jirto meel aan shir jaraa’iid ku qabtay oo aan kula hadlay Saxaafadda ayuu mar kale yiri Safiirka.