Maamulka Culummaa’udiinka Ahlusunna Waljamaaca ee Gobolka Galguduud ayaa sheegay inay shan qof u qabteen bamkii habeen hore lagu weeraray guriga guddoomiyaha golaha fulinta ee Ahlusunna Sheekh Max’ed Yuusuf Xeefow uu ka daggan yahay degmad Guri-Ceel.
Madaxa Ammaanka Degmada Guri-Ceel ee Gobolka Galguduud Sheekh Maxamed Shidane Diiriye (Daqarre) oo saxaafadda la hadlay ayaa sheegay in baaritaanno ay sameeyeen kaddib ay gacanta kusoo dhigeen shantan qof ayna sharciga horgeyn doonaan.
“Shanta qof ee lagu tuhunsan yahay inay weerarka geysteen Maxkamad ayaa lasoo taagi doonaa” ayuu yiri Madaxa Ammmaanka degmada Guri-Ceel oo intaas ku daray in bandow lagu soo rogtay degmada si loo xaqiijiyo ammaanka.
Bamkii lagu weeraray guriga guddoomiyaha fulinta habeen hore ayaa wuxuu dhaawac u geystay saddex qof oo ka mid ahaa odayaal shir ku lahaa halkaas, waxaana shirkaas ka qaybgalayay guddoomiyaha Degmada Guri-Cceel Cismaan Ciise (Taar-dhuleed).
