Waxaa saacadihii ugu dambeeyay waddada dheer ee isku xirta degmooyinka Dhuusamareeb iyo Ceelbuur laga dareemayay dhaq-dhaqaaqyo ciidan oo aad u xooggan oo ay samaynayaan ciidamada Culimaa’udiinka Ahlu sunna Wal-jameeca iyo maleeshiyaadka shabaab kuwaasoo ku hardamaya gacan ku haynta gobolka Galgaduud.

Dhaqdhaqaaqyadan ciidan waxa ay xooggooda billowdeen shalay gelinkii dambe ilaa xalay iyadoo ciidamo ka kala socda labada dhinac ay isku diyaarinayaan dagaal ay galaan, waxaana maleeshiyada Al-shabaab ay dhinacooda dhaq-dhaqaaq ka wadaan waddada ka timaadda Ceelbuur ee tagta Degmada Dhuusamareb, halka ciidamada ahlu sunna ay iyaguna doonayaan inay iska caabiyaan dhinaca ka soo horjeeda

Dad la socday gawaari xamuul oo isaga kala gooshayay gobollada dhexe ee dalka Soomaaliya ayaa waxa ay sheegeen inay Al-shabaab oo ku hubaysan gaadiid dagaal ay saacadihii ugu dambeeyay dhaq-dhaqaaq ka wadeen waddadaasi, taasoo keentay in dhinaca kale ee culimada Ahlu Suna Wal-jameeca ay dhankooda ka bilaabaan dhaqdhaqaaq ciidan.

Waxaa xalay rasaas xooggan oo ka dhacda qoryaha zuugga laga maqlayay nawaaxiga degmada Dhuusamareeb kaasoo u muuqday inuu ahaa mid la tijaabinayay, waxa ayna taasi keentay in qoysaska ku dhaqan degmada Dhuusamareeb ay ka barakacaan guryahooda iyagoo saakay la arkayo gawaarida minibusyada oo ay kireysanayaan qoysaska kuna daad gureysanayaan ilmahooda iyo alaabo wixii ay qaadi karaan