Xubno ka tirsan  Baarlamaanka KMG ah ee soomaaliya oo maanta kulan ku yeeshay Hotelka Weheliye ee magaalada Muqdisho ayaa waxa ay ka digeen in Sheekh Aadan Madoobe uu shirguddoomiya kalfadhiyada baarlamaanka ee la qorsheynayo in xilliyada soo socda lagu qabto golaha shacabka.

Xildhibaanadaasi oo kulanka ka qayb galay ayaa waxa ay sheegeen in haddii uu ku adkaysto Sheekh Aadan Madoobe inuu shir guddoomiyo kalfadhiga uu qaadi doono masuuliyadda wixii ka dhaca halkaasi, waxayna ka dalbadeen madaxweynaha iyo Ra’iisal Wasaaraha in ay arrintaas wax ka qabtaan.

Xildhibaan Cismaan Cilmi Boqorre, oo ahaa guddoomiye ku xigeenkii 2aad ee baarlamaanka balse dhowaan is casilay oo goobta ka hadlay ayaa sheegay in guddoomiyaha baarlamaanka uu is hortaag ku sameeyay dadaallo lagu doonayay in wada hadal looga dhex furo iyaga iyo guddoonka baarlamaanka, waxa ayna sheegeen inuu si cad u diiday guddiyo ay labada dhinac u xil saarteen inay dhex-dhexaadin ka dhex sameeyeen.

Qaar ka mid ah mudanayaashii baarlamaanka ee ka qayb galay kulanka ayaa waxa ay sheegeen inuusan waxba iska beddelin mowqifkoodii hore oo ku aadanaa inuu waqtigii ka dhamaaday guddoonka baarlamaanka, ayna waajib tahay in la doorto hoggaan cusub oo shirguddoomiya kalfadhiyada baarlamaanka