Xarunta Safaaradda Soomaaliya ee Magaalada Nairobi ayaa waxaa kulan saacado badan qaatay ku yeeshay Safiirada dalalka soomaaliya iyo Philippin.
Ujeedada kulankan ayaa waxaa uu ahaa sida la sheegay ka shaqeynta xiriirka labada dal iyo sidii loo amba qaadi lahaa heshiisyo labada dal gaareen bishii Decembar ee sanadkii tagay kadib markii wafdi ka socday Dowladda KMG ah ee soomaaliya oo uu hoggaaminayay Wasiirka kalluumeysiga iyo kheyraadka Badda ahna Ra’iisal Wasaare kuxigeenka C/raxmaan Ibbi socdaal ku tagay xarunta waddanka Philippin ee Maniila, halkaas oo ay wadahadalo kula soo yeeshan madaxda dalkaas.
Danjiraha Soomaaliya ee dalka Kenya Maxamed Cali America iyo Safiirka Philippin u fadhiya Magaalada Nairobi isla markaana u qaabilsan arrimaha soomaaliya DOMINGO D.LUCENARIO,JR. waxay wadahadaladooda diirada ku saareen xiriirka labada dal, xaalada dalka soomaaliya iyo sidii dowladda Philippin u taageeri lahayd dowladda KMG ah ee soomaaliya.
Kulankan oo ay ka qeyb qaateen Saraakiisha Labada Safaaradood, sida Qunsulka Guud ee Safaaradda Soomaaliya Maxamed Cusmaan Aadan (Edson) iyo Saraakiil kale oo Safaaradda Philippin ee Nairobi ka socday ayaa sida laga soo xigtay labada dhinaca waxay muhiimada koowaad la siiyay taageerada Dowladda Philippin u hayso shacabka soomaaliyed.
Saraakiisha Labada Safaaradood waxay isla soo qaadeen dhameystirka qodobo labada Dowladood horey uga wada hadleen kuwaas oo ay ka mid ahaayeen in dowladda Philippin ay tababarro u siin lahaayeen Ciidamada Badda Soomaaliyeed iyo iskaashi guud oo dhex mara labada ciidan, arrintaasoo is afgarad kusoo dhammaatay.
Safiirka Dowladda Philippin u fadhiya Magaalada Nairobi ee qaabilsan arrimaha soomaaliya ayaa sheegay in Dowladdiisu ka shaqeynayso sidii beesha Caalamka u taageero ballaaran u siin lahayd Dowladda soomaaliya iyo sii xoojinta xiriirka saaxibtinimo iyo iskaashi ee ka dhaxeeya labada dal oo muddooyinkan dambe ahaa mid aad u hooseeya kaddib markii horraantii sanadihii 1990- ay burburtay dowladdii dhexe ee Soomaaliya, taas intii ka dambeysayna lagu jiray jahawareer xaaladda soomaaliya.
20-kii bishii Decembar ayaa xarunta dalka Philippin waxaa booqday Wafdi uu hoggaaminayo Ra’iisul wasaare ku xigeenka Dowladda KMG ee Soomaaliya ahna Wasiirka Kalluumeysiga iyo Kheyraadka Badda Prof. Cabdiraxmaan Ibbi, uuna ka mid ahaa taliyaha Ciidamada Badda Soomaaliyeed Amiral Faarax Axmed Cumar (Faarax Qare), waxayna ballaan qaad taageero ka soo heleen Dowladda dalkaas.
Safiirka Soomaaliya ee Magaalada Nairobi Maxamed Cali America ayaa uga mahad celiyay Dowladda dalka Philippin gaar ahaan Safiirka Philippin u qaabilsan Soomaaliya sida niyad samida ku jirta ee Philippin u taageerayso Dowladda soomaaliya iyo booqashada Safiirka Philippin ku yimid xarunta Safaaradda soomaaliya.
