Guddoomiye ku xigeena 1aad ee baarlamaanka Federalka Soomaaliya Prof. Maxamed Cumar dhalxa ayaa waxa uu ka hadlay khilaafka muddooyinkii ugu dambeeyay ka dhex aloosnaa mudanayaasha baarlamaanka ee ku saabsan in uu waqtiga ka dhamaaday guddoonka baarlamaanka oo uu isagu ka mid yahay.

Prof. Dhalxa wuxuu sheeegay in khilaafkaasi gebi ahaantiisa la soo afjaray, arrintaasina ay si wada jir ah hadal murtiyeed uga soo saareen madaxda ugu sarreysa dawladda federalka Soomaaliya, wuxuuna intaasi ku daray in xildhibaanada weli ku doodaya arrintaasi ay ujeedooyin kale damacsan yihiin ayna doonayaan burbur ku timaadda dawladda federalka Soomaaliya.

Guddoomiye ku xigeenka 1aad ee baarlamaanka federalka Soomaaliya Prof. Maxamed Cumar Dhalxa wuxuu sheegay in jiritaanka guddoonka baarlamaanka uu sharci yahay, xildhibaanada ka soo horjeedana wuxuu ugu baaqay inay iska dhaafaan kulamada ay hoteellada ku qabanayaan oo waxa ay hayaan soo hordhigaan kalfadhiga baarlamaanka.

Dhalxa ayaa waxa uu ugu baaqay saraakiisha iyo ciidamada dawladda federalka inay joojiyaan iska hor imaadyada dhex mara dhexdooda, isagoo tusaale u soo qaatay dagaal muddo labo maalmood ah degmada Dharkeynley ku dhex maray ciidamo kala taabacsan Xildhibaan Muuse Suudi Yalaxow iyo Guddoomiye ku xigeenka degmada Dharkeynley Yuusuf Kabaale