Waxaa la yaab leh oo dad badani ay is weydiinayaan sababta ay u dhici weysay in caruurta ay dhaleen horjoogayaasha shabaab isku qarxin waayeen iyadoo ay jirto in dhalinyaro kale oo soomaaliyed si qaldan loo fahamsiiyay diinta islaamka ay isku qarxiyeen dad soomaaliyed oo aan waxba galabsan.
Tan iyo markii aan arkay liiska dhalinyarada is qarxisay ee shabaabka ay adeegsadeen kuma arkin wiil ama gabar ka soo jeeda qoysaska Axmed Cabdi Godane, Sh Mukhtaar Roobow Abuu Mansuur, Fu’aad Shangole, Cali Dheere, Afhayeen Shabaab, Sh Xuseen Fiidow, Xasan Yacquub, Xasan Dahir Aweys, Sh Xasan Turki iyo xubnaha kale ee Shabaab iyo Xisbul Islaam.
Haddiiba la galayo Jano oo lagu helayo in la isku qarxiyo dad soomaaliyed, maxay ku diideen kooxdan aan kor ku soo xusay magacyadooda in ay carruurtooda ku amraan in ay is qarxiyaan, ileyn janadii ayaa la galaya.
Ka soo tag is qarxinta, dadweynow ma maqasheen mise aragteen Wiil uu dhalay Axmed Cabdi Godane, Xasan Dahir iyo Abuu Mansuur oo ku dhintay dagaalada ka socda Magaalada Muqdisho, maxaa u diiday in caruurtooda janada galaan ileyn meel ka fiican ma jirte, waxaa hubaal ah in dhalinyarada dagaalada ku dhimanaysa iyo kuwa iyagoo is qarxinaya dhinta ay ka soo jeedan qoysas kale oo soomaaliyed.
Tusaale kale Sh Xasan Dahir Aweys oo ka soo jeeda qoys ballaaran caruurtiisa qaar ka mid ah waxay ku nool yihiin dalka Masar,waxayna haystaan waxbarasho, nabadgalyo, caafimaad iyo nolol wanaagsan, xataa kuwa uu adeer u yahay kuma jiraan dagaalada dhamaan qoyska Aweys waxay ku nool yihiin dalka dibadiisa marka laga reebo tiro yar oo ku nool gudaha dalka kuwaas oo ku dhaqan degaano nabdoon.
Sidoo kale Axmed Cabdi Godane hogaamiyaha Maleeshiyada Shabaab qoyskiisa waxay degan yihiin Magaalada Hargeysa, caruurta uu dhalayna kama aysan qeyb qaadan dagaalada ka socda soomaaliya, wuxuu adeegsadaa oo kaliya caruurta umadda soomaaliyed kuwaas oo si qaldan diinta loo fahamsiiyay.
Hooyadii dhalay Wiilkii isku qarxiyay 3 dii Decembar Hotelka Shaamow,wejigeeda farxad kama muuqan markii ay maqashay in wiilkeedu isku qarxiyay Hotelka Shaamow, isla markaana uu dilay dad wax tar u leh bulshada, balse Godane iyo kooxdiisa farxad darteed ayay la qosleen maalintaas maadama uusan wiil ka dhiman balse dadka la dilay ay ka mid ahaayeen Wasiiro.
Hadaba dadka soomaaliyed ee caruurtooda ku dhimanaya dagaalada ka socda dalka, waxaa la gudboon in ay gartaan xaqiiqda dhabta ah, waxaana loo baahan yahay in loo caqli celiyo caruurta la qalday ee maalin walba ku dhimanaya dagaalada qaarna loo diyaariyay in ay is qarxiyaan.
In Wiilasha dagaalamaya iyo kuwa is qarxinaya loo caqli celiyo waxay baahan tahay in ay ka qeyb qaatan waalidiinta caruurta ka sokow dadaalka bulshada ee ku aadan in maskaxda caruurta laga saaro fikirka qaldan ee shabaab waajibaadka koowaad waxaa uu saran yahay waalidiinta.
