Wasiirka Amniga Qaranka C/llaahi Maxamed Cali (Sanbaloolshe) oo ku sugan Gobolka Hiiraan ayaa sheegay in abaabulo ka dhan ah kooxaha dowladda ka soo horjeeda uu ka wado Gobolka.

Wasiirka oo la hadlay warbaahinta ayaa sheegay inuu u joogo gobolka Hiiraan sidii looga xoreyn lahaa, waxaa uu ugu yeeray cadawga, isagoo farta ku fiiqay in dadka gobolka ay diyaar u yihiin in ay iska qaadaan culeyska iyo dhibaatada ay ku hayaan kooxahaas.

“Kuwa cadawga ee gobolka ku sugan, ayaan dooneynaa inaan ka xoreyno, qorshaheygana waxaa uu ku wajahan yahay arrintaas”ayuu yiri C/llaahi Sanbaloolshe oo horay uga tirsanaa Hey’adaha Sama falka, balse markii uu xilkaas ka geeriyooday Cumar Xaashi loo dhiibay.

Wasiirka ayaa sidoo kale sheegay in Ciidamada dowladda ay diyaar u yihiin in ay howl galaan, isla markaana dalka oo dhan gacanta ku qabtaan, inkastoo uu ka gaabsaday xilliga arrintaas la filan karo.

Mr Sanbaloolshe oo ka soo jeeda Gobolka Hiiraan ayaa sheegay inuu diyaar u yahay inuu ku dhinto wadada uu ku socdo, isagoo soo hadal qaaday in howsha uu hada wado uu horay ugu geeriyooday Wasiirkii hore Amniga Cumar Xaashi Aadan.

Dowladda KMG oo dhistay Ciidamo fara badan ayaa mudooyinkii u dambeeyay waday abaabul dagaal oo ka dhan ah Xoogaga ka soo horjeeda.