Wadada kaliya ee gasha Suuqa Bakaaraha ayaa saaka dib u furantay, kadib muddo labo maalmood oo ay xirneyd, isla markaana jahwareer gelisay ganacsigii Suuqa weyn ee Bakaaraha.
Dib u howl gelida Wadadan oo xilligan ah halka isku xirta qeybaha ay Muqdisho ugu kala qeybsan tahay dhinacyada iska soo horjeeda ayaa waxaa soo dhoweeyay darwalada gaadiidka Bl-ka.
Mid ka mid ah Darwalada Gaadiidka ayaa sheegay in xaalad shaqo la’aan ah ay soo wajahday labadii maalmood ee u dambeysay, kadib markii ay wadadaas xirantay, waxaana mararka qaar gaadiidka uu isticmaali jiray wadada warshadaha oo uu ka geli jiray Bakaaraha.
Gudoomiyaha Gudiga Ganacsatada Suuqa Bakaaraha Cali Maxamed Siyaad ayaa ugu baaqay dhinacyada isku hor fadhiya nawaaxiga Suuqa in ay ka weeciyaan dagaalada Suuqa oo ah goob ganacsi.
Shabaabka iyo Ahlu Sunah ayaa isku hor fadhiya meelo isu muuqda oo kala ah Isgoyska Bakaaraha iyo agagaarka Biyo dega Dabka, taasoo keentay in Gaadiidka saameyn ku yeesho labadii maalmood.
Ahlu Sunah ayaa wali u gur-guuranaya Suuqa Bakaaraha, kadib markii dhowr jiho ay ka kubaareeyeen, waxaana la ogeyn sida Ahlu Sunah xilligan ugu guuleysan karaan la wareegida Suuqa Bakaaraha
