Wasiirka Lacagta Dowladda Soomaaliya C/raxmaan Cumar Cismaan (Injineer Yariisow) oo la hadlay wakaaladda Wararka ee Reuters maalintii arbacada ah ayaa sheegay in dalka Soomaaliya ay ku sugan yihiin 12-xubnood oo ka tirsan Ururka Al-Qaacida.

Yariisow wuxuu sheegay in hadalkan ay ka heleen sirdoonkooda ayna xubnahaas u kuurgalayaan in Al-Qaacida ay u soo guuri karto Soomaaliya kaddib dagaalo qaraar oo ka dhacay dalalka Afgaanistaan iyo Ciraaq.

“Waxaan wararka ku haynaa in 12-sarkaal oo ka tirsan Al-Qaacida ay Soomaaliya soo galeen labadii todobaad ee ugu dambeeyay, kuwaasoo kasoo tagay dalka Yemen” ayuu yiri Wasiirka Lacagta Soomaaliya.

Ururka Al-Qaacida ayuu sheegay Eng. Yariisow inuu dhinaca dhaqaalaha iyo tababarka ciidamada ay ka taageeraan al shabaab, kuwaasoo dagaal kula jira Dowladda Soomaaliya.

Wasiirku ma sheegin jagooyinka ay saraakiishan ka hayaan Ururka Al-Qaacida sidoo kalena wuxuu ka gaabsaday inuu sheego dalalka ay kasoo jeedaan, iyadoo hadalka wasiirka uu kusoo beegmayo kaddib markii dalka Yemen uu dhawaan sheegay in Al-Qaacida bariga dhexe ay u guurtay Soomaaliya.

Eng. C/raxmaan Yariisow ayaa sheegay in saraakiishan ay ka dageen garoomo ku yaalla Koonfurta Soomaaliya, laba ka mid ahna ay haatan ku sugan yihiin Magaalada Muqdisho.