Radio Muqdisho oo ah Idaacad ku hadasha Codka Dowladda KMG ah ee Soomaaliya ayaa saaka markii u horeysay sii deysay Laanta Af Soomaaliga ee VOA-da, labo maalmood kadib markii Shabaab ay mamnuuceen dhageysiga Idaacadaas.

Labadii maalmood ee u dambeysay ayaa dadka ku dhaqan Caasimada iyo gobolada kale waxaa jahwareer ka galay dhageysiga Idaacadahaas oo ay si toos uga dhageysan jireen hirka FM-yada, hase ahaatee markii Shabaab soo saareen go’aanka ay ku mamnuuceen Idaacadaas ayaa waxaa yaraaday meelaha aadka looga dhageysto.

Idaacada VOA-da ee Codka Mareykanka Laanteeda Afka Soomaaliga ayaa la sheegay in ay heshiis la gashay Radiyaha Dowladda KMG, si uu u tabiyo barnaamijyadeeda, waxaana saaka ilaa shalay dadka Muqdisho kala socdeen dhageysiga VOA-da Mowjada FM-ka ee Radio Muqdisho.

Laakiin Idaacada BBC-da oo ah tan looga dhageysi badan yahay ayaa dadka ay aad ugu jahwareersan yihiin, waxaana ay si dhib leh ku helaan Mowjadaha gaa gaaban ee SW-ga, taasoo mararka qaar ay ku adkaado helideeda.

Dadka Muqdisho iyo kuwa ku dhaqan Gobolada dalka ayaa ah kuwo dhagaha ka xiran, oo aan sidii hore siyaasada ula socon, waxaana dadkaas ay si fudud u dhageysan jireen Mowjada FM-ka.

Shirkada Warbaahinta Horn Afrik oo lacago badan ka macaashi jirtay sii deynta BBC-da iyo VOA-da ayaa loo aqoonsaday, waxaana tani ugu yaraan keeneysaa in ay ku weyso dhaqaalihii faraha badnaa ee ay ka heli jirtay Idaacadahaas Caalamiga ah.

Inkastoo aan wali BBC-da laga soo deyn Radio Muqdisho, hadana waxaa muuqata inuu jiro is afgarad u dhaxeeya VOA-da oo tartan ballaaran kula jirta BBC iyo Idaacada ay Dowladda maamusho ee Radio Muqdisho.

Cunaqabateynta ku dhacday Idaacadahan Caalamiga ee looga diiday in laga dhageysto Mowjadaha FM-ka ayaa waxaa la is weydiinayaa sida wariyeyaasheeda ka howl gala dalka ay ugu shaqeyn lahaayeen, warbixinada si toos ugu gudbin lahaayeen