la galiyey 20 April 2010.
Mid ka mid ah Haweenka ku jira Baarlamaanka KMG ah ee Somaliya ayaa shaaca ka qaaday in ay tahay musharaxa jagada Guddoomiyaha Baarlamaanka Soomaaliya.
Xildhibaanad Aamino Maxamed Mursal, oo dhawaan safar kaga soo laabtay dalka Liibiya ayaa sheegtay in ay muhiim tahay in tixgelin gaar ah la siiyo haweenka Soomaalida maadama muddo badan haweenka xuquuqda ay u lahaayeen hoggaaminta dalka laga hortaagana.
“Waxaan ahay Musharaxa jagada Guddoomiyaha Baarlamaanka, ujeedada aan isugu soo taagay tartanka guddoonka Baarlamaanka waxaa waaye in kor loo qaado awooda dumarka”ayay tiri Xildhibaanad Aamino Maxamed Mursal.
iyadoo ka hadlaysay aragtida beesha Caalamka ee ah in haweenka laga qeybgeliyo hoggaanka Siyaasadda dalka ayaa waxay sheegtay in beesha Caalamka looga baahan yahay in ay taageeran qorshaheeda ah in ay tahay musharaxa jagada Guddoomiyaha Baarlamaanka.
Waxay xustay in dumarka soomaalida ay yihiin kuwa ugu badan ee dhibaatada ka soo gaaray hogaan la’aanta dalka la degtay.
Mar wax laga weydiiyay in ay taageero ku helayso Xubnaha Baarlamaanka ayaa waxay sheegtay in ay ku kalsoon tahay xubnaha Baarlamaanka soomaaliya waxayna kula talisay in markan la tijaabo dumarka.
Aamino, oo la soo kulantay hoggaamiyaha Liibiya, ayaa sheegtay in ay uga mahad celinayso doorka Hoggaamiyaha Liibiya Col Mucamar al Qadaafi siiyay haweenka,isagoo ku tilmaantay in Qadaafi si weyn u taageeray haweenka iyo caruurta qaarada Afrika.
Waxay ka codsatay hoggaamiyaha Liibiya inuu gacan ka siiyo dadaalka ay uga jirto in ay ku guuleysato hogaaminta Guddoonka Baarlamaanka.
Xildhibaanad Aamino Maxamed Mursal waxay ka mid tahay xubnaha ugu muhiimsan haweenka Baarlamaanka Soomaaliya ka dhex muuqda,waxayna Wasiirka haweenka iyo arrimaha qoyska ka soo noqotay Xukuumaddii uu madaxda ka ahaa Prof Cali Maxamed Geeddi.
