Xarunta barlamaanka Yurub ee magaalada Strasbourg ee ku taal dalka Fransiiska ayaa bishan April 20-dii lagu soo gebagebeeyey orod dheer oo marathon ah.
Waxaa orodkan loogu magacdaray “Rajada Soomaaliya”, waxaana qorshuhu yahay in indhaha caalamka lagu soo jeediyo Soomaaliya, oo ku sugan xaalad aad u murugeysan oo ey halligeen dagaalo aan dhamaat laheen, burbur iyo gaajo.
Orodka maratoonka oo daboolay masaafo dhan 609 km waxa uu ka soo billowday magaalada Alessandria ee ku taal waqooyiga Talyaaniga bishan April 16di, waxaana ka qeybqaatay 12 orodyahan, 9 nin iyo 3 dumar oo ilaa iyo magaalada Strasbourg isu dhiib dhiibayey toosh nooca olimbika ah oo ka sameysanaa calanka iyo khariidada Soomaaliya.
Waxaa iyagoo sida tooshka ay orod ku mareen dalalka Talyaaniga, Swizterland Jarmalka iyo Fransiiska. Dal kasta oo ay orod ku maraan waxa ay xusuusinayeen inaan la iloobiin soomaalida dhibaateysan.
Waxaana xarunta barlamaanka Yurub ee Strasbourg subaxnimadii ku soo dhaweeyey, wafdi ka socday barlaamaanka Yurub oo ay u badnaayeen kuwa ka socday dhinaca Talyaaniga.
Galabtiina waxaa qaabilay guddoomiyaha baarlamaanka Yurub, Jerzy Buzek, waxaana qeybgalayaasha maratoonka oo uu horscday duqa magaalada Alessandria Piercarlo Fabbio, ay u gudbiyeen codsigooda ah in laga dhiidhiyo oo wax laga qabto rafaadka iyo silica ay ku sugan yihiin dadweynaha Soomaliyeed.
Guddomiyaha baarlamanka Yurub, waxaa uu sheegay in uu aad ugu faraxsan yahay hawsha ay qabteen qabqanqaabiyeyaasha maratoonka nabadda, isagoo intaas ku daray in arrinta Soomaaliya ay isaga si gaar u taabaneyso, madaama gabar uu dhalay ay intii muddo ah ku hawshoon tahay hawlo samafal oo ka socda gobolo ka tirsan dalka Soomaaliya.
Baaqa ay abaabulayaasha marathonka soo aadiyeen baarlamaanka Yurub, waxaa ay ku codsanayaan in hey’adaha Midowga Yurub ay qaadaan tallaaboyin wax tar u leh Soomaaliya oo ah dal la maqlo oo kaliya, marka laga hadlaayo burcadeed iyo go’aano ka soo baxa kooxaha Islaamiga.
Waa aragti ayey leeyihiin aan si dhab ah uga tarjumeynin baahida dhabta ah ee ka jirta dalka Soomaaliya. Sidaasi darteed, ayaa waxa ay ka codsanayaan mudanayaasha ka tirsan barlamaanka Yurub in la dareemo oo loo gurmado dhibka heysta Soomaalida.
Qorshaha orodkan lagu taagersan yahay dib u soo nooleynta iyo nabadda Soomaaliya, waxaa abaabulay urur Talyaani ah oo lagu magacaabo STELLA BIANCA xidigta cad, oo saldhig ku leh magaalada Alessandria lana aasaasay sannadkii 2007.
Waa urur samafal ah oo uu wax ka aasaasay dhakhtar asalkiisu Soomaali yahay oo ku takhasusay cudurka dhimirka oo la yiraahdo Luigi Sartore.
Marathonka loogu ololeynayo nabadeynta Soomaaliya, waa kii labaad oo uu hirgaliyo ururka samafalka Stella Bianca.
Marathonkii ka horreeyey waxaa uu qabsoomay sannadki 2008, markaasi oo ka qeybgalayaasha ay orod ku mareen waddooyinka Talyaaniga, iyagoo orodkii ay ka soo billabeen magaalada Alessandria ku soo gebagebeeyey magaalada Roma
