Dagaalo u dhaxeeyay Culumaa’udiinka Ahlu Sunah Waljamaacay iyo dablayda Alshabaab ayaa waabarigii saaka ku dhex maray Gobolka Galgaduud, kaasoo ahaa dagaalo culus oo la isu adeegsaday Hubka noocyadiisa kala duwan.
Dagaalka ayaa ka dhacay inta u dhaxeysa Degmooyinka Guriceel iyo Ceelbuur ee Gobolka Galgaduud, waxaana dagaaladaas ay geysteen qasaare kala duwan oo dhimasho iyo dhaawac ah.
Warar la helayo ayaa tilmaamaya in dagaalka oo ka dhacay Tuulada Galqoryaale oo ka tirsan degmada Ceelbuur ay soo weerareen maleeshiyada Alshabaab, waxaana halkaas horay ugu sugnaa Culumaa’udiinka Ahlu Sunah.
Dadka deegaanka oo saaka ka cararay dagaalada ayaa soo sheegaya in deegaanka ay haatan gacanta ku hayaan Alshabaab, iyadoo la dareemayo xiisado iyo abaabulo dagaal soconaya.
Mudooyinkii u dambeeyay ayaa waxaa jiray dagaalo u dhaxeeya Ahlu Sunah iyo Shabaab, iyadoo Gobolka Galgaduud intiisa badan ay gacanta ku hayaan Culumaa’udiinka Ahlu Sunah oo dagaal kaga itaal roonaaday Shabaab.
