Ciidamada howlgalka Nabad ilaalinta AMISOM ayaa sheegay in ay wax badan ka ogyihiin qorshaha Shabaab ay ku doonayaan in ay ku qarxiyaan dekadda caalamiga ah ee magaalada Muqdisho.

Brejiye Bahuuko Afhayeenka Ciidamada Midowga Afrika ayaa sheegay in AMISOM ay ka war hayso qorshahaas ay maleegayaan Shabaab ee ka dhanka ah Dekadda Muqdisho, wuxuuna ku tilmaamay mid lala yaabo oo aan guul ku dhamaan doonin.

Wuxuu sheegay in ay ka warqabeen waqti hore in ay maleeshiyada Shabaab deegaan ka tirsan Sh/ Hoose ay ku diyaarinayeen doon ay u adegsadaan qarxinta dekadda Muqdisho, hase yeeshee taas ay dhamaatay markii ay Maleeshiyadu bixin waysay qiimaha uu ninka iska leh doonta u gaaray, ka dibna arrintaasi ay hungowday.

“naguma cusba arrintaan waan helnay macluumaad ku saabsan oo ah in Sh/hoose ay doon ku diyaarinayeen, laakin waxay is fahmi wayeen isku xirihii doonta oo lacagta ayay bixi waayeen, Shabaab hadda ma heystaan Dhaqale, waan helnaa macluumaad kasta oo shabaab dhexdooda ah” ayuu yiri afhayeenka AMISOM Bahuuko oo u waramayay Radio Muqdisho.

Afhayeenka AMISOM wuxuu wax lala yaabo ku tilmaamay ficillada qaar ee ay Shabaab Sameynayaan “welwelka iigu weyn wuxuu yahay sababta ay shabaab u bartilmaameedsanayaan Dekadda, haddii la qarxiyo dekadda imisa askari oo AMISOM ka tirsan ayaa ku dhiman karta?, dadka ku sugan 98% waa Soomaali, maxaa loo dilayaa Soomaalida Muslimiinta ah?” ayuu hadalkiisa ku daray Mr. Bahuuko oo isku dayga Shabaab ku tilmaamay nid aan shaqeyn doonin.