Cumada Ahlu Sunna Waljamaaca ayaa saakay la wareegay gacan ku heynta degmada Ruun Nirgood ee Gobolka Sh/dhexe ka dib dagaal ay la galeen Maleeshiyada Shabaab oo maalmahaan ku sugnaa degmadaasi.

Subaxninadii hore ee saakay ayaa Xoogagga Ahlu Sunna waxa ay weerar ku qaadeen Degmada oo dhawaan ay Shabaabku kala wareegeen dadka deegaanka, waxana goobta ka dhacay dagaal culus oo sababay in Shabaabku ay isaga cararaan Ruun Nirgood.

Mid ka mid ah Madaxda Xoogagga ASWJ eek u sugan Ruun Nirgood ayaa sheegay in dagaalka saakay ay ku dileen inta ay arkeen afar qof oo uu ku jiro Horjoogaha ay Shabaabku u magacaabeen Degmadaasi oo lagu magacaabo cabdi Xuseen kana soo jeeda deegaanka ceelbacad.

Sidoo kale wuxuu sheegay mas’uulkaan ka tirsan Ahlu Sunna in ay la wareegeen hub iyo Rasaas badan oo ay Shabaabku uga carareen saldhigga degmada Ruun Nirgood, waxayna Shabaabku ku carareen Jihooyin kala duwan oo deegaanka ku xeeran.