Sida ay sheegayan wararka naga soo gaaraya Gobolada Dhexe ee Soomaaliya, Ciidamada Caalamiga ee ilaaliya xeebaha Soomaaliya oo sanadihii ugu dambeeyay ku bateen kooxaha burcad badeedka ayaa xalay 9 kii saac  weerar hubeysan ku qaaday xeebta ama dekadda hobyo, iyagoo burburiyay doonyo halkaas ku xirnaa.

Oday ka mid ah odayaasha degaanka Hobyo oo lagu magacabo Jimcaale Guuleed ayaa xaqiijiyay weerarkaas wuxuuna sheegay in si xoog ah ku soo galay Dekedda waxayna burburiyeen dhamaan doonyo ku xirnaa Dekedda iyagoo qaar kalena qaatay.

Jimcaale, ayaa sheegay in doonyaha la burburiyay ka sokow Ciidamadaas watay afar markab oo kuwa dagaalka ah horey u sii qaateen 3 doonyo oo sida uu sheegay odayga ay lahaayeen dad kalluumeysata ah.

Intaas kadib galabta abaarihii 11-kii saac ayay mar kale ku soo laabteen ciidamadaas Dekeda Hobyo, wuxuuna sheegay oday Jimcaale in markii ay soo laabteen ay rasaas ku fureen dekedda iyo magaalada.

Waana markii ugu horeysay oo ciidamada Caalamiga ee dagaalka kula jira kooxaha burcad badeeda soomaalida weerar ku qaadan degaanada la aaminsan yahay in kooxaha burcad badeeda ku badan yihiin.