Ururka Midowga Afrika iyo Qaramada Midoobey ayaa si isku mid ah u soo dhoweeyay heshiiskii shalay magaalada Addis Ababa ku kala saxiixdeen Dowladda KMG iyo Ahlu Sunah Waljamaacah, kaasoo ah awood qeybsi.

Qoraal ka soo baxay Xafiiska Wakiilka Qaramada Midoobey Soomaaliya Axmed Walad Cabdalla ayaa lagu qeexay muhiimada heshiiskaas u leeyahay geedi socodka nabada Soomaaliya.

Axmed Walad Cabdalla ayaa si weyn u taageeray dadaalka Culimada qunyar socodka Soomaaliya ee Ahlu Sunah Waljamaacah, waxaana uu bogaadiyay doorka wada hadalka Addis Ababa ku lahaayeen Beesha Caalamka.

Warqadda qoraalka ah ee ka soo baxay Xafiiska Walad Cabdalla ayaa sidoo kale lagu xusay in heshiiskaasi uu shacabka Soomaaliyed u horsedi karo in ay gaaraan nabad iyo horumar iyo in ay labada dhinac ay iska kaashadaan ka qayb qaadashada nabad ku soo dabaalidda dalka Somaliya oo haatanba ay ka jiraan colaado, isagoona intaa ku daray in heshiiskasi uu daba joogay heshiis ay labada dhinac bishii June ee sanadkii tagay ku dhexmaray magaalada Nairobi ee xarunta dalka Kenya iyadoo heshiiskiii shalayna uu ahaa mid lagu dhameystirayey qodobadii lagu heshiiyey.

War ka soo baxay Midowga Afrika ayaa iyana lagu cadeeyay in heshiiskaas uu mira dhal u noqon karo nabad ku soo dabaalida Soomaaliya, waxaana labada dhinac looga dalbaday sidii ay u meel marin lahaayeen heshiiskaas.

Ahlu Sunah Waljamaacah ayaa qeyb ka noqon doonta Dowladda KMG, taasoo ay ka heli doono xilal muhiim ah sida Wasiiro iyo saraakiil xaga ciidamada ah, hase ahaatee waxay dad badan ay eegayaan sida ay labada dhinac u fulin doonaan heshiiska