Gudoomiyihii hore Gobolka Banaadir Maxamed Cumar Xabeeb (M/Dheere) ayaa ku tilmaamay Hogaamiyeyaasha Shabaab kuwo qabyaalad wada, isagoo ku eedeeyay in ay dhibaato ku hayaan dadka ka soo jeeda Hawiyaha sida uu hadalka u dhigay.

Maxamed Dheere oo ku sugan Magaalada Muqdisho ayaa sheegay in sababihii ay Shabaab uga mamnuuceen gar gaarka bani’aadanimada ee WFP ay tahay mid aar-gudasho ah oo lagu cunaqabateynayo sida uu yiri dadka ka soo jeeda Koofurta Soomaaliya.

“Mukhtaar Roobow, Ina Shongole iyo Godane waxay wadaan diin ma ahanee ee waa qabiil, waxayna go’aansadeen in dadka ay madaxa ka gooyaan iyo in ay gaajo ku dilaan”ayuu yiri Maxamed Dheere.

Mar uu ka jawaabayay hadal uu horay u jeediyay Afhayeenkii hore Alshabaab Mukhtaar Roobow Abuu Mansuur oo aheyd in Maxamed Dheere uu ku tilmaamay dadka Muslimiinta in ay Argagixiso ayuu taas iska fogeeyay, isagoo sheegay in Argagixiso ay caalamka joogto, Muslimiinta oo dhana aanay argagixiso aheyd sida uu yiri.

“Isagaa markii uu la hadlayay dadkiisa Mukhtaar Roobow wuxuu yiri Messagadiina ayaa doolar idinku badalaa, waana taas mida uu dadka ku sugan Ceelasha Biyaha raashinkii gar gaarka looga celiyay”ayuu si kulul u yiri Maxamed Dheere.

Maxamed Dheere oo horay u soo maamulayay Magaalada Jowhar ayaa sidoo kale sheegay in dhamaan bakhaaradii daawooyinka ee Jowhar iyo hey’adihii sama falka ay bililaqeysteen, wixii dambeeyayna ay ku fasaxeen dadka sida uu yiri.

“Nimankaan waxay u socdaan aar-gudasho, wixii dhacay 91-kii ayay hada doonayaan in aarsadaan, Gaalo meel walba waa jogtaa, Ina Shongole muu aado Puntland iyo Godane muu waqooyi tago Hargeysa Gaalaa joogtoo, ka soo bilow K/Galkacyo ilaa Afgooye dadka degan ayaa lala dagaalsan yahay”ayuu yiri Maxamed Dheere oo u muuqday nin arrinta hada socota u rogay mid Qabiil.

Maxamed Dheere ayaa ammaan u jeediyay Culumaa’udiinka Ahlusuna sida ay ula dagaalameen Shabaab iyo Xisbul Islaam, isagoo dadka ku dhaqan Gobolka Banaadir iyo nawaaxigiisa ugu baaqay in si taa la mid ah ay isaga celiyaan sida uu hadalka u dhigay.