Guux xoogan oo aad dareemi karto ayaa ka jira magaalada Caasimada ee Muqdisho kaas oo aad si weyn ugu dareemyso dhinaca Dowladda KMG oo iyada ilaa dhamaadkii sanadkii tagay waday abaabul dagaal oo la arkaayey ciidamado badan oo loo daad gureynayaa safafka hore ee jiida dagaalka kuwaas oo la rumeysan yahay in ay ka soo noqdeen tababar ciidan oo ay ku qaateen dalalka dibada.

Diyaar garowga Dowladda ayaa la dhihi karaa waa mid xoogan isla markaana aad moodaa in ay kal iyo laab ay ka tahay sidii ay kaga adkaan laheyd mucaaradkan hore ugu soo mindi afeystay.

Dad badan ayaa mudaba shaki gelinayay abaabulka dagaal ee ay Dowladda wado oo ay u arkayeen in ay tahay SHIMBIRYAHOW HEESA maxaa yeelay waxaa loo arkayay in ay weli tahay Dowladdii tabarta yareyd ee mar walba fagaarayaasha dagaalka looga adkaan jiray balse waxaa iminka dadweynaha Muqdisho ay ku soo buraarugeen hadal ay dhawaan saxaafada caalamka ay qoreen oo sheegayo in Dowladda Mareykanka ay qeyb tahay howlgalkaan la doonayo in cidiyaha looga saaro xoogaga islaamiyiinta Soomaaliya kuwaas oo hada loo arkayo in ay mudan tahay in wax laga qabto.

Haddaba howl gaalkan la hadal haayo isla markaana aan la garaneynin xilliga uu bilaaban doono ayaa ku soo aadayo xilli muhiim ah oo Madaxweynaha Dowladda KMG ah uu booqasho ku tagay dalka ingriiska oo xulufo la ah Mareykanka.

Howlgalkan haddii laga qaado waxaa la aaminsan yahay in guulo waa weyn laga gaari doono maadama ay muran xoogan ka dhaxeeyo kooxaha islaamiyiinta oo kala jabkooda faa’iido weyn u yahay Dowladda.