Ururka midowga Africa ayaa sheegay in dib u dhac uu ku yimid heshiis maanta lagu waday in ay  kala saxiixdaan Dowladda KMG iyo Culamaa’udiinka Ahlu suna Waljamaaca.

Mas’uul ka tirsan ururka midowga Africa ayaa sheegay in ila iyo maalinta isniinta ah ee soo socoto oo ay taariiqdu ku beegantahay 15 March dib loo dhigay xaflad maanta lagu waday in ay ka dhacdo magaalada Addis Ababa ee xarunta dalka Ethiopia taaso ku aadan in heshiis ay kala saxiixdaan wafdi  ka socda DKMG Soomaaliya oo uu hogaaminayo Ra’iisul wasaare Cumar C/rashiid  iyo wafdi kale oo isna ka socda Culmaa’udiinka Ahlu Sunna Waljamaaca oo la sheegay in uu hogaaminayo Gudoomiyaha Culumaa’udiinka Ahlu Sunna Waljamaca oo lagu magacaabo Macalin Maxamuud Xasan.

Gudoomiyaha golaha amaanka iyo nabad galyada ee midowga Africa Ramtana Lamabara ayaa sheegay in uu dib ugu dhacay heshiiskaasi sababo la xeriira Xaga Loojistikada, isagoo tilmaamay in ay sii wadi doonaan wadashaqeynta kala dhexeysay labada dhinac waa Ahlu Sunna Waljamaaca iyo DKMG Soomaaliya inkastoo ay jiraan xubno aan wali soo xadirin sida uu sheegay Lamabara gudoomiyha golaha amaanka iyo nabadgalyada ee midowga Africa.

Ramtana Lamabara ayaa ku nuux nuuxsaday in ay wali soconayaan wada tashiyo ku aadan saxiixida heshiiskaasi kuwaasoo uu sheegay in ay sii socon doonaan kadib dhamaadka todobadkan si ay u suurta gasho fulinta heshiiskaasi gudaha dalka Soomaaliya.

magaalada Addis Abba ee caasimada dalka Ethiopia ay kulamo uga soconeeyn wafdi uu hogaaminayay Ra’isul wasaare ku xigeenka DKMG Somaaliya ahna wasiirka maaliyada  Shariif Xasan Sheikh Aadan iyo sidoo kale wafdi la sheegay in uu hogaaminaya godoomiyaha maamulka Culamaa’udiinka Ahlu Sunna waljamaaca Macalin Maxamuud Xasan