Madaxweynaha Soomaaliya Shariif Sheekh Axmed ayaa ka qeyb galay furitaanka shir madaxeedka 22aad ee Madaxda Carabta, kaasoo maanta gelinkii dambe ka furmay magaalada Sirte ee dalka Libiya.

Madaxweynaha ayaa ka hor inta uusan furmin shirka waxaa uu kulamo gaar gaar ah la qaatay Madaxdii Carbeed ee shirkaas ka soo qeyb galay, iyadoo Madaxweynaha Sudan Cumar Xasan Albashiir ay isku gacan qaadeen madasha.

Sidoo kale Madaxweyne Shariif oo ka faa’ideysanaya ka qeyb galkiisa labaad ee Shirweynaha Carbeed waxaa uu la kulmay Amiirka dalka Cumaan oo uu kala hadlay arrimaha Soomaaliya.

Madaxweyne Shariif ayaa kulan gaar ah la qaatay Hogaamiyaha Libiya Mucaamir Al-Khadaafi, kaasoo xalay gelinkii dambe ku soo dhoweeyay garoonka Diyaaradaha.

Halka shirka ka dhacayo oo ah Teendho weyn oo laga taagay Magaalada Sirte ayaa waxaa ku sugan Hogaamiyeyaal fara badan oo ka socda Carabta, waxaana ay ku jeex jeexi doonaan arrimaha Soomaaliya iyo arrimo badan oo dalalka Carabta ka mid ah.

Madaxweyne Shariifka Soomaaliya ayaa aad u daneynaya in natiijo wax ku ool ah ay ka soo baxdo shirka Madaxda Carabta, inkastoo shirkii ka horeeyay uu Madaxweynuhu uu dhaliilay balan qaadka loogu yaboohay Dowladdiisa.

Shirkan ayaa la filayaa in Dowladda Soomaaliya ay ka hesho balan qaad Maaliyadeed, iyadoo taana ay uga faa’ideysaneyso Saaxibtinimada ka dhaxeysa Madaxweyne Shariif iyo Hogaamiyaha Libiya Mucaamir Al-Khadaafi oo haya Hogaanka Jaamacada Carabta