Saraakiil ka tirsan Dowladda Soomaaliya ayaa sheegay in ay diyaariyeen Ciidamadii la wareegi lahaa Gobolada Koofur Galbeed Soomaaliya oo ay gacanta ku hayaan Xoogaga Dowladda ka soo horjeeda.

Aadan Saransoor oo ka mid ah Saraakiisha Dowladda ee ku sugan Doolow ayaa sheegay inuu diyaar garowgooda ku aadan duulaanka ay ku qaadaan Gobolada gacanta Dowladda ka maqan uu gabo gabo ku dhow yahay.

Sarkaalkan ka soo jeeda Gobolada Bay iyo Bakool ayaa sheegay in Gudigii 14ka xubnood ee dhowaan loo magacaabay sidii ay kaga shaqeyn lahaayeen diyaarinta Ciidamo duulaan ku qaadan Goboladaas ay wadaan kulamadooda ugu dambeeyay.

Aadan Saransoor ayaa sheegay in muddo badan ay ku jiraan abaabul xoogan, waxaana uu cadeeyay in dhowaan ay duulaan ku qaadi doonaan Gobolada Bay, Bakool, Gedo iyo Jubooyinka oo dhamaan ka taliyaan Shabaab iyo Xisbiga.

Dowladda KMG oo hada maamusho qeyb yar oo ka kooban Caasimada ayaa dadaal xoogan ugu jirta sidii ay ula wareegi laheyd Gobolada dalka qaarkood, iyadoo qorshahan uu yahay kii ugu ballaarnaa oo ay ka qeyb qaadanayaan dalal shisheeye.