Ciidamada badda ee ilaaliya xeebaha Somalia waxay toddobaadkan gudihiisa qabteen ilaa 3 markab oo ah kuwa budhcad-badeeddu u adeegsadaan inay ku qaataan doonyaha dheere, hubka, iyo raashinka, kuna gaaran badweynta ay wax ka qafaashaan
Sarkaal ka tirsan ciidanka badda ee NATO, Christian Rune waxa uu sheegay in bishan March 1-deedii iyo 2-deedii in la fashiliyey oo la qabtay laba markab oo ay budhad-badeedu ku adeegtaan xeebaha Somalia. Waana markabkii saddexaad ee noocaasi aha ee la qabto toddobaadkan.
Sida lagu sheegay war-saxaafadeed ka soo baxay xafiisyada ciidamada badda ee NATO ee ilaalinaya xeebaha Somalia, hawlgalkani waxa gaar ahaan u fuliyey markabka waaweyn ee dagaalka ee HDMS ABSALON oo ka mid ah maraakiibta ku sugan xeebaha Somalia, lagana leeyahay dalka Denmark.
Ciidamada saaran markabkaasina waxay sheegeen in markii la qabtay maraakiibtaasi budhcad-badeedda ee la baaray in laga helay hub badan, doonyo yarar , qalab iyo saanad, laakiin aan lagu arag wax qalab ah oo ah nooca kalluumaysiga
Budhcad-badeedda Somalidu waxa la sheegay inay haystaan maraakiib iyo doonyo ay soo qafaasheen oo ay u adeegsadaan inay ku qaataan doonyaha yaryar ee dheereeya, hubka iyo rasaasta, iyo weliba raashinka iyo shidaalka, si ay u gaaran badaha waaweyn iyo meelo fogfog oo ay ka ugaarsadaan maraakiibta caalamiga ah. Waxayse ku doodaan inay wataan doonyo kalluumaysi.
Sri Lanka iyo Somaliland
Sri lanka ayaa iyana sheegtay in shaqaale saarna markab lagu haysto dekedda Berbera in la filayo in la soo daayo shaqaalahaasi toddobaadkan gudihisa. Waxayna sheegtay Sri Lanka iyo shaqaalahaas iyo markabkoodaba lagu haystwey xoog ilaa bishii September ee kalhore, uu una xannibnaa amar maxkamadeed ka dib markii uu khilaaf ka dhex-dhashay sharkaddii markabku u rarnaa, milkiilayaashii markabka, iyo maamulka somalida.
Markabkaas oo ahaa nooca xamuulka amma badeecadaha qaada, waxa la sheegay inuu sitey calanka Panama, lagana lahaa Imaaraadka Carabta. waxana saarnaa 14 shaqaale oo isugu jira 7 Hindi ah, 3 reer Sri Lanka ah oo u ku jiro kabtankii markabku, 2 Pakistan ah iyo 2 Somali ah
